Bianca du Plessis
“Here, genoeg nou, asb! Jy’t ons nie gemaak om soveel hartseer te kan hanteer nie.”
Só lui Lindie Theart van Gansbaai se inskrywing op sosiale media ná die nuus van die ongeluk wat die jong Jaiden Dickson van Gansbaai se lewe geëis en haar vriendin Elandré Hans in ‘n kritieke toestand gelaat het. Nuus van die tragiese ongeluk het die gemeenskap, wat steeds rou ná Ricardo Tobias se moord verlede week, soos ‘n vuishou getref.
Jaiden (24), ‘n uitblinker op sportgebied, en haar 26-jarige vriendin was volgens berigte van Hermanus na Gansbaai op pad toe die Renault Clio waarin hulle gereis het op die R43 tussen Hermanus en Stanford naby Misty Mountains van agter deur ‘n wit BMW getref is.
AO David Payne, die bevelvoerder van die Stanford-polisie se speurtak, het bevestig dat die botsing kort ná middernag aangemeld is. ‘n Saak van strafbare manslag word ondersoek.
“Albei vroue het buite die voertuig langs die pad gelê. Die bestuurder is op die toneel dood verklaar en haar passasier sowel as die bestuurder van die wit BMW is per ambulans hospitaal toe geneem. Die passasier (Elandré) is later na die Tygerberg-hospitaal oorgeplaas,” het Payne gesê.
Jaiden en Elandré sou die volgende oggend aan ‘n netbalwedstryd tussen Sea Stars en Caledon deelgeneem het.
Natasha Julies, voorsitter van Sea Stars-netbalklub, sê hulle het besluit om dié wedstryd na aanleiding van die tragiese nuus af te stel. Lede van die klub het Sondagoggend blomme gelê en ‘n kruis by die ongelukstoneel opgerig. “Alles voel nog so onwerklik. Albei het van jongs af vir ons gespeel en voor ons grootgeword,” het Julies snikkend vertel.
Jaiden het in verskeie sportsoorte, onder meer, netbal, rugby en atletiek, uitgeblink. Sy was ook ‘n finalis in die gewilde Hermanus Times/SuperSport- Let’s Play-kompetisie. Sy het ná matriek maatskaplike werk aan die Universiteit Stellenbosch studeer, maar later besluit om humanitêre studies aan te pak.
Ure ná Jaiden en Elandré se tragiese ongeluk het ongeveer 150 lede van die gemeenskap aan ‘n optog deelgeneem om geregtigheid vir die moord op Ricardo Tobias te eis en ‘n memorandum aan die polisie oorhandig. In die memorandum word onder meer geëis dat strenger polisiëring by veral kroeë in die hoofweg gedoen moet word om te verseker dat dié kuierplekke aan wetgewing voldoen. “Die vermoede bestaan dat dwelms vrylik by van die persele verkoop en misbruik word,” lui die memorandum.
Tobias se erg verminkte lyk is Maandag 24 Maart omstreeks 03:00 op die hoek van Bloulelie- en Angelierstraat, enkele meter van sy woonplek in Angelierstraat, gevind. Hy was volgens berigte op pad huis toe ná ‘n aand se kuier en karaoke by ‘n plaaslike kroeg toe hy vermoor is.
Sers. Abigail Naidoo, ‘n woordvoerder vir die Gansbaai-polisie, het gesê Tobias het vier steekwonde aan die linkerkant en twee bo-aan die regterkant op sy rug gehad het. “Sy gesig is vergruis aangesien hy ook met ‘n stuk beton oor die kop geslaan is,” het sy bygevoeg.
Die wreedheid van die moord, sê Theart, wat ‘n vyfdegeslaginwoner van Gansbaai is, is iets wat ongehoord in hul dorp is en aan dié van Anene Booysen herinner.
Lede van die gemeenskap was Maandag by die Hermanus-landdroshof toe twee verdagtes in verband met Tobias se moord verskyn het. Die verdagtes, onderskeidelik 18 en 19, is verlede naweek in hegtenis geneem. Die saak is tot 9 April uitgestel. Die verdagtes sal tot dan in aanhouding bly.
