Die somer is híér en dit beteken ook die slangseisoen is terug. ’n Bekende slangvanger het die volgende moets en moenies vir vanjaar se slangseisoen beklemtoon:
Giftige slange
’n Kobra-byt bevat nerotoksiese gif wat die senuweestelsel aantas en verlamming kan veroorsaak, terwyl ’n byt deur ’n pofadder sitotoksies is, wat beteken dat dit weefselselle doodmaak. Wanneer een van hierdie slange gewaar word, is dit noodsaaklik om doodstil te staan en wanneer dit veilig is, stadig weg te beweeg en dadelik ’n slangvanger te kontak.
Minder gevaarlike slange
Ander minder gevaarlike slange is onder meer die skaapsteker, gestreepte Karoo-sandslang, die rooilipslang, bruin huisslang asook die molslang. Volgens hom hou hierdie slange geen lewensgevaar vir mense in nie, maar hulle kan wel seer byt – veral die molslang, wat “ ’n hele vinger kan afruk”.
“Slange is nie aggressief nie en byt gewoonlik uit wanhoop – wanneer iemand op hulle trap, hulle per ongeluk in ’n beperkte gebied vasgekeer word of wanneer iemand probeer om een dood te maak. Gewoonlik sal slange –- as hulle die geleentheid kry – eerder wegseil, maar baie sal nie huiwer om te byt wanneer hulle ’n gevaar of bedreig voel nie,” het ASI gesê.
Teengif
“Suid-Afrikaanse Vaksine-produsente (SAVP) produseer twee soorte teengif vir Suid-Afrikaanse slange – ’n monovalente boomslang-teengif wat selde gebruik word, aangesien die boomslang selde byt, en ’n polivalente teengif wat gemaak word van die gif van tien verskillende slange.” Dit sluit kobra’s, swartmambas, die rinkhals, pofadder en gaboen-adder in. Teengif word slegs in hospitale toegedien, want, soos baie ander medisyne, kan die pasiënt newe-effekte ervaar wat anafilaktiese skok insluit en tot sterftes kan lei. Sedert die aanbreek van die Covid-19-pandemie het SAVP produksieprobleme ondervind, en oor die afgelope paar jaar was daar verskeie voorvalle van ’n tekort aan teengif.
Die meeste groot hospitale in hoërisiko- gebiede hou ’n bietjie teengif in voorraad, maar dit raak by die dag minder. “Om op te maak vir die tekort, word alternatiewe teengif genaamd Pan African Premium ingevoer, maar dit vereis dubbel die dosis, en dus dubbel die prys,” volgens ASI.
