Op en wakker lede van die Bredasdorp-polisie het daarin geslaag om drie diewe wat op heterdaad betrap is, in hegtenis te neem en van die gesteelde goedere terug te kry. AO Jakobus Marthinus, die Bredasdorp-polisie se woordvoerder, sê lede van die B-skof het verlede Dinsdag (4 Oktober) patrollie gedoen toe hulle gesien het ’n sakeondernemings se deur staan oop. “Die lede het gesien die deure van CAM in Fabrieksweg se stoorkamer staan oop. Hulle het ondersoek ingestel en op inbrekers afgekom, wat op die vlug geslaan het. Drie verdagtes is in hegtenis geneem en gesteelde goedere ter waarde van ongeveer R85 000 is teruggevind,” het Marthinus bevestig. Hy het die lede van die B-skof onder leiding van AO JP Viljoen geloof vir hul uitstekende werk en toewyding. “Welgedaan, kollegas!” het hy bygevoeg.
