’n Ouma se huis ruik altyd na nog. Dit ruik na die eerste en
laaste happie van ’n melktert, en om die een of ander rede is daar altyd nog
iets wat jy moet proe. Oumas se konstante pogings om ons vet te voer, is iets
wat ons moet waardeer, want net ’n ouma kan soveel liefde in haar kos sit en aandagtig
met ’n koppie koffie sit en kyk hoe jy elke krummel verorber. Vandeesweek deel
ons graag ’n paar resepte wat jy kan probeer as jy na ouma en haar kos verlang.
KARRINGMELK-SKONS
BESTANDDELE
400 g (715 ml) koekmeel
100 g (120 ml) strooisuiker
2,5 ml bakpoeier
2,5 ml koeksoda
3 ml sout
175 g (190 ml) botter, in blokkies gesny
250 ml karringmelk
1 eier, geklits, om bo-op te verf
METODE
Plaas oondrak in middel van oond. Verhit oond tot 220 °C.
Sif meel, strooisuiker, bakpoeier, koeksoda en sout saam in ’n mengbak. Voeg
botter by en vryf in die meel in totdat dit soos broodkrummels lyk. Maak ’n
holte in die middel van die meelmengsel en voeg die karringmelk by. Meng goed.
Keer uit op ’n meelbestrooide oppervlak en maak seker die deeg is lekker
gemeng. Druk plat – sowat 3 cm dik. Druk skons uit met ’n koekiedrukker. Voeg
oortollige deeg saam en druk nog skons uit.
Plaas skons ’n paar sentimeter uitmekaar op ’n gesmeerde
bakplaat. Smeer ’n bietjie geklitste eier bo-op elke skon en plaas in die oond.
Bak 15 – 20 minute. Haal uit en sit warm voor met botter en konfyt.
PAMPOENPOFFERTJIES
BESTANDDELE
250 ml meel
25 ml suiker
10 ml bakpoeier
250ml gaar koue pampoen
1 eier, geklits
50 ml melk.
METODE
Sif meel, suiker en bakpoeier saam.
Voeg pampoen, melk en eier by en meng goed.
Braai lepelsvol in warm olie en dreineer op kombuispapier.
Gooi sous oor poffertjies.
SOUS
1 k suiker
60 ml botter
1 k water
1 k melk
25 ml vlapoeier.
Braai die suiker en botter in ’n kastrol tot goudbruin.
Roer water versigtig by en dan die melk.
Roer aanhoudend totdat die karamel gesmelt is.
Maak die vlapoeier aan met ’n klein bietjie water en roer by
die res van die sous. Roer totdat die sous verdik.
OUMA SE FRIKKADELLE
BESTANDDELE
2 snye bruinbrood
700 g maalvleis
½ k fyngekapte pietersielie
1 fyngekapte ui
¼ t fyn wonderpeper
½ t fyn koljander
¼ t fyn kruienaeltjies
1¼ t fyn neutmuskaat
1½ t sout
3 e wit asyn
1½ k appelkoosblatjang
METODE
Week die brood in water, druk dit uit en krummel dit in die
maalvleis.
Gooi die fyngekapte pietersielie en ui by.
Nou kom die wonderpeper, koljander, fyn kruinaeltjies,
neutmuskaat en sout by.
Voeg die asyn en appelkoosblatjang by en meng liggies in.
Rol frikkadelle, pak dit in ’n oondskottel en maak die kerrie-uiesmoor.