Vier mannetjies weg

Die saga rakende die bobbe­jane in die Overstrand het ’n nuwe wending geneem nadat besluit is om vier bobbe­jaanmannetjies van die Pringlebaai-trop te verwyder.

Natuurliefhebbers is onthuts gelaat nadat die Overstrand-munisipaliteit (OM) in Desem­ber aangekondig het dat die vier bobbejaanmannetjies na die Limpopo-provinsie geneem gaan word en daar in ’n reser­vaat geplaas gaan word. Nie net gaan hulle gesteriliseer word nie, maar hulle is ook uit hul natuurlike habitat verwyder. Wat hulle nog verder kwaad maak, is die feit dat die OM die belange­groep op 14 Desember gerusgestel het dat hulle nog nie besluite geneem het oor die bobbejane nie, maar op 20 Desember het hulle die nuus gekry dat die mannetjies verwyder gaan word.

Volgens die belangegroep wat na die welstand van die bobbe­jane omsien, is die mannetjies die slagoffers van die Over­strand-bobbejaanbestuurs­program.

Volgens die persverklaring wat die OM in Desember uitgereik het, is die vier bobbejane al van Oktober 2021 af deel van Pringlebaai en die jongste toevoeging het hom in Julie 2022 by hulle aangesluit.

“Al vier bobbejaanmannetjies het hulle aan stropery skuldig gemaak en het die meeste van die tyd in die dorp gewoon. Verdere klagtes is ook van inwoners gekry dat die vier mannetjies nie net kos direk van mense steel nie, maar ook deure oopmaak en dan die huise stroop,” het die munisipale bestuurder, Dean O’Neill, gesê.

Volgens deskundiges is dit veiliger om die bobbejane uit die dorp te verwyder aangesien hulle hul vrees vir mense verloor het.

“Van die inwoners steur hulle nie aan die reëls nie en voer nie net die bobbe­jane nie, maar los hul vullis buite, wat die bobbejane na huise lok.”

Wat die groep verder laat rooi sien, is dat net een bobbejaanmannetjie gaan oorbly, na bewering ’n onervare mannetjie wat nou die trop moet lei. Luidens ’n persverklaring deur die ondersteuningsgroep wat na die belange van die bobbejane omsien, is die mannetjies slagoffers van die omstrede bestuursprogram wat in die Kogelberg-biosfeer be­kend gestel is en het die vinni­ge besluit oor die verwydering van die bobbejane vrae laat ontstaan. “Die besluit het saam met die jaarlikse instroming van toeriste en vakansie­gangers geval en dit is duidelik dat geld bo die natuur gesien word – dit is ’n duidelike patroon wat sedert 2019 gesien is toe die OM ’n kom­mer­siële operateur aangestel het om die bobbejane te be­stuur.

“Die konflik tussen bobbe­jane en die inwoners het toege­neem met meer mense wat in Pringlebaai kom woon en die diere se natuur­like habitat oorgeneem het,” het die persverklaring gelui.

Volgens die persverklaring is die troppe vroeër suksesvol deur die Pringlebaai-belasting­betalersvereniging en Cape Nature bestuur. “Hierdie moniteringsprogram, wat deur die gemeenskap finansier is, is as suksesvol beskou en menige inwoner het hulle oor die ‘ou manier’ van monitering uitge­spreek.”

Die belangegroep vra die same­wer­king van die OM om na die belange van die bobbejane om te sien. Hulle het ook ’n beroep op OM se burgemeester Annelie Rabie gedoen om haar verbintenis tot die omgewing te herbevestig en saam met hulle aan volhoubare oplossings te werk. “Ons moet ’n balans vind, anders kan die natuur onherstelbaar beskadig word,” lui die persverklaring.